Browsing by Author "Mezyani Mohammed"
Now showing 1 - 1 of 1
Results Per Page
Sort Options
Item Iberdan n tsuqilt deg udlis «Abruy si tsekla tagraɣlant» n Lyazid Werdi(Université Mouloud Mammeri, 2023) Genni Remdan; Mezyani MohammedAmahil, nebḍa-t ɣef sin n yixefawen igejdanen. Deg yixef amezwaru, newwi-d awal ɣef tsuqilt s umata: asbadu, amezruy, iswan d yiberdan n tsuqilt. Aḥric-a, d awal ɣef teẓri i d-yesgerwen timuɣliwin ɣef tsuqilt, ladɣa nefka-d kra n tbadutin i as-gan kra n yinagmayen deg taɣult-a. Syin, nerna-d cwiṭ ɣef umezruy-is: melmi d-tebda, amek tennerna, d kra n yimedyaten ɣef wayen i d-yettwasuqqlen...Akken diɣ, i d-nefka iswan n tsuqilt s umata akked yiswan-is deg teqbaylit. Rnu ɣer-s, nefka-d ṣa 7 n yiberdan i yettwassnen di tsuqilt. Deg yixef wis sin, newwi-d awal ɣef tsuqilt ɣer teqbaylit, imi d tinna i yeggten. Leqdic-a, nebna-t ɣef umagrad n Saɛid CEMMAX ɣef liḥala n tsuqilt seg/ɣer teqbaylit. Syin, newwi-d cwiṭ awal ɣef liḥala n tsuqilt seg teqbaylit ɣer tutlayin niḍen, ɣas ulamma d annar ur nugit ara. Syin ɣer-s, nega tasleḍt n yiberdan n tsuqilt i udlis «Abruy si tsekla tagraɣlant» n Lyazid WERDI. Ilmend n tesleḍt, nefren mraw d semmus 15 n yiḍrisen s mennaw n yisental d talɣiwin (tasrit d tmedyazt). Di taggara, amaru Lyazid WERDI, yesbeyyen-d deg udlis-is belli taqbaylit d tanesbaɣurt, tezmer ad d-tawi ayen akk yettwarun ama di tsekla neɣ di tussna. Akken diɣ temzer i yisental i nɣil ttwarun ḥala s tutlayin tibeṛṛaniyin. Nufa-d diɣ deg tezrawt-a, imsuqqel yeḍfer akk iberdan n tsuqilt ilmend n yisental i yefren: - Amsasa, nufa-t aṭas deg yiḍrisen iseklanen, imi yefka-asen rruḥ n teqbaylit ɣas akken yugem-iten-id seg yidelsan iɣerfanen niḍen. - Abrid n wawal s wawal, nufa-t s tuget deg yiḍrisen i d-yewwin ɣef tussna, maca, ma yella ur yufi ara awal i iwulmen yeṭṭafar abrid n ugdazal n unamek. Tikkwal niḍen, d asemsawi, anda i d-yessegzay ugar. - Ma yella d arwas, yessexdem-it deg wawalen ur nuzzil ara (termes techniqques) akked tenfaliyin yesɛan izmulen. Amaru, yeldi tawwurt s udlis-is i wid iran ad d-suqqlen seg tutlayin tibeṛṛaniyin, yesbeyyen-asen-d aḥric n wamek i yetterwat wannar n tsuqilt. Akken diɣ i asen-yeldi tawwurt i usnulfu d tira n yisental wukkud ur nuɣ ara tannumi di tutlayt-nneɣ, ladɣa wid icudden ɣer tussna d tallit tamirant. Ayen nessaram sya ɣer sdat, ad as-neg tasleḍt talqayan i udlis «Abruy si tsekla tagraɣlant» s lekmal-is, ama i yiḍrisen i d-yettwasuqqlen, ama i wid i d-yesnulfa; imi d-yegla deg yijufar-is s waṭas n umaynut deg wayen yerzan tasuqilt ɣer teqbaylit d tarrayin i yesseqdec umaru (Seg tesrit ɣer tmaedyzat/ Seg tmedyazt ɣer tesrit).