WERDI, LYAZID2023-02-142023-02-142022TASEKLA TAMAZIƔT D TSUGNAhttps://dspace.ummto.dz/handle/ummto/2009893p.; 30cm.(+cd)Amahil-nneɣ, yuweḍ-d ɣer taggara-as, ihi yessefk fell-aɣ ad d-nefk agzul n wayen akk iɣef d-nuwi awal di tezrawt i as-nga i wungal «Tiṭ d yilleḍ: Ayen d-qqarent tewriqin» n Muḥend Akli ṢALḤI, syin ad d-nefk tiririyin ɣef yisteqsiyen i nessers di tezwert n leqdic-nneɣ i nessers ɣef tiẓri n tnagmayt Joëlle GARDES-TAMINE d kra n yinagmayen i d-yufraren deg tezrawin ay gan ɣef tsenɣanibt. Amahil-nneɣ, nefreq-it ɣef sin n yixefawen igejdanen. Deg yixef amezwaru, nuwi-d awal ɣef wungal s umata, laṣel n wawal Roman, tabadut-is d leṣnaf-is; syin nemmeslay-d ɣef wungal aqbayli, ladɣa aẓar n wawal seg i d-yefruri wawal ungal (NGL), syin nefka-d amezruy-is seg wungal amezwaru n Belɛid AT ƐLI (Lwali n Wedrar), armi d ungalen imaynuten i d-yeffɣen deg useggas n 2022 ideg nella, gar ( Tiṭ d yilleḍ: Ayen d-qqrarent tewriqin) i nefren ad as-neg tasleḍt tasenɣanibt deg umahil-nneɣ. Ma yella deg yixef win sin, nuwi-d awal ɣef tmiḍrant n tsenɣanibt i d-yuɣen aẓar seg tesnukyest taqburt d unerni-ines ɛleḥsab n kra n yimussnawen i d-ihedren ɣef waya deg tezrawin-nsen. Syin, nefka-d tibadutin i as-fkan yinagmayen yettwassnen d yiswiren n tezrawt-is iɣef d-tuwi awal Joëlle GARDES-TAMINE. Akken daɣen i d-nuwi awal ɣef tugniwin n uɣanib d tbadutin ay gan yimussnawen ama i tugna, ama i uɣanib. Yuɣ lḥal, nekkes-d ammud n tumnayin i yezdi wassaɣ n urwas ( Takanit, tumnayt, tasmiddant) i wumi d-nefka daɣen kra n tbadutin i yettunefken i tugniwin-a, syin akkin nefren-d kra n yimedyaten seg yal tugna, nga-asen tasleḍt tasenɣanibt di taggara n yixef-agi wis sin. Di taggara, amaru Muḥend Akli Ṣalḥi, iswi-ines yezger akkin i ccbaḥa taseklant i nuɣ tannumi nettaf-itt deg wungalen niḍen, imi seg tazwara armi d taggara d amseḍfer n ddeqs n tkaniyin d tumnayin yeddsen akken iwata, icebḥen nezzeh, ara yawin imeɣri ad yinig deg ccbaḥa taseklant d uswir yufraren wuɣur tuweḍ tsekla taqbaylit. Syin ad d-naf, dakken deffir n ṭṭaqa n tugniwin-a, ggten yiznan i yebɣa ad yesɛeddi i yimeɣriyen, ama ɣef wayen yerzan amdan, neɣ timetti d wayen i as-d-yezzin. Amaru, ɣur-s aṭas n yiswiyen niḍen mennug wigi d-nebder yakan, ad naf dakken aseqdec n ṭṭaqa n tkaniyin d tumaniyin...maci iwakken ad yesseɣzef neɣ ad yessemɣer aḍris-is, maca ad naf yebɣa ad yesken s tugniwin tadyizt s teqbaylit i yettawin ar taɣulin n tesleḍt taseklant ladɣa tiberraniyin, am wakken i t-id-tenna Joëlle GARDES-TAMINE 1 Ayen nessaram ar sdat, ad as-neg tasleḍt tasenɣanibt s telqeyt i wungal «Tiṭ d yilleḍ: Ayen d-qqarent tewriqin» ,imi, d-yegla deg yijufar-is s umaynut deg wayen yerzan taɣult-a n tsekla. Tinfaliyin-is d tefyar-is, ddsent si tazwara armi d taggara s ccbaḥa taseklant d telqeyt n yinumak. Nsuffeɣ-d ammud i nseqdec ilmend n tesleḍt n tugniwin n uɣanib i nefren ad neqdec fell-asen, maca nelken d akken ungal imelles (yeččur) d tugniwin n uɣanib niḍen, yecban tangisemt, tayḍisemt... i nebɣa ad nesleḍ s telqeyt sya ar sdatotherThesis