Tasleḍt n yiwudam deg uḍris Afenğal n lqehwa n Belɛid At AƐli
Loading...
Date
2023
Authors
Journal Title
Journal ISSN
Volume Title
Publisher
Université Mouloud Mammeri
Abstract
Asentel n umahil, yebna ɣef tesleḍt n yiwudam deg uḍris n Belɛid At Ɛli Afenğal n lqehwa. S wakka neṣṣaweḍ ad d-nerr ɣef usteqsi i yellan deg tmukrist n ukatay-nneɣ deg uḍris agi : ad d-nebggen amek i yebna umaru iwudam n uḍris-a (amek i asen-isemma, amek i ten-id-yeglem, azal n udiwenni deg uḍris-a, tigawin n yiwudam, assaɣen i yellan gar yiwudam, atg).
Iswi-nneɣ, deg taggara, ad d-nessebgen ttawilat i yessemres umaru di lebni-nsen d leṣnaf n yiwudam i d-yufraren deg uḍris-agi.
Tasleḍt n yiwudam deg uḍris-agi n Belɛid At Ɛli, d asentel i d-aɣ-yuwin ad nadi wa ad d-nagem ammud n tmussniwin yerzan tasekla taqbaylit. Seg yigmaḍ imezwura i nezmer ad ten-id-nebder di taggara n tezrawt i uḍris-a, deg-s d tiririt i usteqsi i d-nefka di tazwara n unadi imi nebɣa ad d-nẓer d acu-tent tfukas i yessemres umaru akken ad yessudes aferdis n yiwudam deg lebni n uḍris-is. Ilmend n waya, nreṣṣa axeddim-a ɣef tarrayt i d-yessumer Ph. HAMON i tesleḍt n yiwudam.
Deg tesleḍt, amaru, yefka azal d ameqqran i yiwudam deg lebni n uḍris. Yessemres ddeqs n tfukas i d-yessebganen azal-nsen akken iwata. Ph. HAMON, deg tarrayt i d-yessumer d akken awadem d azmul deg uḍris, ihi nezmer ad d-nini amaru Belɛid At Ɛli ula d netta yessemres iwudam-is am wakken d izmulen.
Deg uḥric amezwaru, d anadi asdawan ɣef umaru-agi d tezrawin i yettwaxedmen ɣef Lwali n Udrar.
Deg uḥric wis sin, d taṣleḍt n yiwudam, nemmeslay-d ɣef uwadem sumata imi netta iyeṭṭfen adeg ameqqran deg uḍris-agi. Deg uḥric-agi, nuwi-d awal ɣef yisem. Ad t-naf yebḍa ɣef sin n leṣnaf: ṣṣenf amezwaru d ayen yeɛnan ismawen i yeqqnen ɣer tmetti taqbaylit. (am Dehbiya, Faṭima ...).
Ma d ṣṣenf wis sin, d ayen yerzan ismawen i d-yesnulfa umaru (Lla Merquma). Neṣṣaweḍ ad d-naf belli ismawen-agi mmalen-d assaɣen i yellan gar yiwudam am (Faṭima, Muḥend, Lḥusin/ Dehbiya, Sseɛdi) sɛan assaɣ n twacult.
Sin ɣer-s, nerra lwelha ɣer uglam n yiwudam. Deg uglam n yiwudam, nuwi-d awal ɣef tulmisin n tfekka d ṭṭbiɛa (nerra tidmi ɣer wamek i ttexmimen yiwudam). Deg uḍris-agi Afenğal n lqehwa, ulac aṭas n tulmisin icudden ɣer tfekkiwin d llebsa n yiwudam.
Ma d tulmisin icudden ɣer ttexmam n yiwudam, ad naf tulmisin yeqqnen ɣer nniya n uwadem Dehbiya. Ihi, sumata, amaru yessemres aglam usrid akked arusrid Adiwenni, yegget acku tawsit-agi, s yis-s iyebna uḍris. D ameslay i yettilin gar yiwudam. Sumata, aḍris-a, yeṭṭuqet deg-s udiwenni si tazwara armi d taggara.
Nessaweḍ nbeggen-d amek i yesuddes umaru lebni n yiwudam deg uḍris-is, nufa-d ihi, amaru-a yesuddes akken iwata aferdis n yiwudam ilmend n wayen i aɣ-d-tefka tarrayt n Philippe. Hamon.
Deg umahil-agi, ha-ten-id yigmaḍ uɣur d-nessaweḍ, nezmer ad d-nini aḍris-a d tamezgunt acku Belaid At Ɛli iglem-d iwudam, yefka-asen tulmisin n yiwudam, yefka-asen tudert daxel n uḍris s tarrayt n Philippe Hamon. Nezmer, ad d-nini, aḍris-agi, mačči d adiwenni kan gar yiwudam, acku yebna am wakken tebna tmezgunt. Ma nmuqqel ɣer tama-nniden, nezmer ad d-nini adris-a mačči d tamezgunt imi imrabḍen irumyen ur d-uwin ara deg tezrawt-nsen ayen i d-yettbegginen aḍris-a d tamezgunt.
Ilmend n waya, nezmer ad d-nini, amaru-a, yebna-d aḍris-is akken iwata. Anect-a, d ayen i d-yessebganen aswir n tmussni n umaru-a deg tira daɣen d ayen i as-irennun azal i tsekla n teqbaylit yuran sumata.
Nessaram ad d-asent tezrawin anda ara as-gen asesmel i uḍris-agi i yura umaru. Nessaram ad d-asent tezrawin i wid ara ikemmlen ɣef unadi n uḍris Afenğal n lqehwa i yura Belɛid At Ɛli.
Description
54 p.; 30 cm. (+CD-Rom)
Keywords
Iwudam, Belɛid At Ɛli, Aḍris Afenğal n Lqehwa
Citation
Tasekla Tamazight